Abisal Edurne Ibáñez iruindarraren seigarren bilduma da. Aurreko bostetan bezala, moda eta antzerki-jantziak diseinatzen dituen emakume honek ehun edo material birziklatuak erabili ditu, egiteko eta sortzeko modu berriak ikertzeko, gero antzerki-jantzietako edo jantzi artistikoetako lanetan tankeratuko dituenak.

Bildumaren aurkezpen ofizialaren kariaz, Ibañezekin eta inguruan duen talde artistiko osoarekin –makillatzailea, ile-apaintzailea, modeloa, argazkilaria eta  bideo-sortzailea– argazki saio batean egoteko aukera izan dugu. Abisal bildumaren inspirazioa zein izan den eta jantzietako bakoitza nola egin duen kontatu digu.  Besteak beste, errafiak, zetak eta pailletak edo lentejuelak kautxuarekin, antzokietako zingilekin eta zamau-babesekin nahasi dira bilduma honetan. Emaitza ezin ikusgarriagoa da.