Itxi ditzagun begiak une batez. Imajina dezagun gela ilun bat, eta bertan landareak, kableen bidez konektatuta elkarren artean. Kable horiek beren zurtoinetan dabiltza, erritmo kardiakoa neurtzeko monitoreen antzera. Hurbil gaitezen pitin bat gehiago. Orduan ikusiko dugu elementu artifizial batzuk landareen egituren oinarrian txertatuta daudela, sustraien ondoan hazten ari direla. Are gehiago, ikusiko dugu jada haren zati direla, ezin direla bereizi…  

Begiak berriro zabaltzen ditugunean ohartuko gara ikusten ari ginena cyborg lorategi bat zela. Eta ez, ez da zientzia-fikzioa.

Bero-uharteak –beroa pilatzen den eta muturreko tenperaturak dituzten lekuak, itzalik eta landarerik ez dutelako– lorategi-mota hauen ohiko kokalekuak dira. Haietan, elementu organikoak eta gailu zibernetikoak nahastu egiten dira, landarearen alde organikoaren gaitasunak teknologiaren bidez hobetzeko helburuarekin. Bai, bai, hala da.

Monitorera konektatua egotea ez da alferrikakoa, landareen eta beren ingurunearen beharren gaineko informazioa ematen baitu. Eta informazio hori bereziki garrantzitsua izan daiteke ingurumen-iraunkortasunerako, ingurumen-baldintzak monitoreatzeak klima-aldaketaren ondorioak erritmo azkarragoan gertatzen ari diren lekuak denbora errealean jakinaraztea ahalbidetzen baitu.

Eta, jakina, ingurunearen ezagutza horrek eta teknologiaren kontrolak onura ekonomikoak ere ekar ditzake. Esate baterako, landare baten hostoen barnean jasotzen diren eta bere ahorakina handitzeko argi-presentziari erantzutea ekartzen dioten seinale elektriko txikiak detektatzeko azterlanak egiten ari dira. Hori bera teknologia berri batean aplika daiteke, landareak manipulatzea ahalbidetuko duena beren eguzki-kontsumoa handitzeko eta, hartara, oraingoak baino laburragoak diren denbora-tarteetan eta baliabide gutxiagorekin, fruten eta barazkien ekoizpena emendatzeko.

Fikziozko film baten gidoitik aterea dirudi horrek guztiak, ezta? Bada, errealitate berria da, klima-aldaketa borrokatzeko gizakiari tresna berriak eman nahi dizkion errealitate berria.