Denbora luzea daramagu pertsona asko ikusten, makila eskuan dutela, aire zabaleko ibilaldiez gozatzen, ibai-parkeetan eta naturako beste bazter batzuetan. Ibilketa nordikoan (nordic walking, ingelesez) aritzen dira, gero eta zale gehiago erakartzen duen kirol batean. Aire zabalean egiten den ariketa-mota bat da, eta eskiatzeko erabiltzen diren makilen antzekoen laguntzarekin eta bultzadarekin ibiltzean datza. Ikasteko erraza da eta bere teknika du.

Kirol honen jatorria 1930eko hamarkadan dago, iraupen-eskian aritzen ziren eskiatzaile asko udako eta udazkeneko entrenamenduetan “ibilketa makiladuna” esaten ziotena egiten hasi zirenean, egoera fisikoa hobetzeko eta neguan entrenamenduei intentsitate egokiarekin heltzeko baldintzetan egoteko.

Geroago, kirolari profesionalen entrenamendu horiek herritar ororengana iristen joan ziren eta orain gure gizartean zabaltzen ari den praktika bat da, oso emaitza onak dituena. Arrazoia sinplea da. Oinez ibiltzea oso onuragarria bada osasunerako, ibilketa nordikoa are gehiago da, erresistentzia, indarra, malgutasuna, koordinazioa eta oreka aldi berean lantzen dituen ariketa aerobiko integrala baita; gorputzeko giharren %90 trebatzen ditu; ez da agresiboa; giharren ahalegina banatzen du, artikulazioei ahalegina eskatu gabe; gorputzaren jarrera hobetzen du; eta edozein egoera fisikotara eta adinetara egokitzen da. Horrez gain, ikasteko erraza da.

Adituen arabera, ematen dituen onura fisikoak asko dira. Entrenamendu aerobiko ona denez, osasun kardiobaskular onari eustea laguntzen duena, kardiopatiak, 2. motako diabetesa eta asma gutxitzen laguntzen du. Gainera, pisua kontrolatzen laguntzen du (kaloria-kontsumo handia ekartzen du, korrika arin ibiltzetik gertu dagoena), faktore metabolikoak hobetzen ditu, immunitate-sistema indartzen du eta narriadura kognitiboa prebenitzen du. Era berean, ikusi da osteoporosiari eta artrosiari aurre egiten laguntzen duela, ibilketa nordikoa egiten den bitartean bizkarra, abdomena, hankak, besoak eta bularrekoak trebatzen baitira.

Izan ere, ariketa hau errehabilitazio-ariketa interesgarria izan daiteke bularreko minbizia izan duten edo duten emakumeentzat, besoak aurrerantz eta atzerantz energiaz mugitzeak galtzarbeko gongoil linfatikoak kendu dizkieten pertsonei sendatzen laguntzen baitie.

Baina onurak ez dira bakarrik alderdi fisikokoak. Alderdi emozionaletan ere islatzen dira. Beste edozein ariketa fisikorekin gertatzen den moduan, horretan aritzeak endorfinak sortzen ditu, eta horiek arduratzen dira gure ongizateaz eta baikortasunaz. Horri gehitzen badiogu ibilketa nordikoan taldean aritu daitekeela, erraza da pentsatzea lotura sozial osasungarriak sortzea ekar dezakeela.

Eta jakina, aisia osasungarri eta iraunkorraz gozatzeko aukera ematen du, aire zabalean eta naturarekin harremanetan.