Pablo Palazuelo margolari, eskultore eta grabatzaile espainiarra izan zen, ospe handikoa. Hain zuzen, jaso zituen sari edo aitorpenen artean Kandinsky saria (1952an) eta Velázquez saria daude (2004an).

Haren lanaren zati bat erakusgai dago Nafarroako Unibertsitatearen Museoan: zortzi margolan, bi marrazki eta eskultura bat. Eta, zehazki, haietan aurkitu du Mancoeduca ingurumen-heziketarako programak inspirazioa haurrentzako jarduera bat proposatzeko, Museoko bertako heziketa-sailarekin elkarlanean.

Hartara, joan den abuztuaren 22an, “Hi Artist!” Museoaren hiri-kanpaldietan izena emandako gazteen taldeak bere ingurune hurbileneko natura ezagutzean sakontzeko eta bere sormena garatzeko aukera izan zuen, Palazueloren lanean oinarri hartuta.

“Palazuelo saiatzen zen natura ezagutzean sakontzen, artearen lengoaia erabilita oso estilo pertsonalarekin. Haren sortze-prozesuan, begirada heztea funtsezkoa da. Hori dela-eta, jarduera begiradatik abiatu zen; naturarako begirada sakon batetik, artearen lengoaiaren bidez, haren ezagutzan sakontzeko. Azken batean, proposamenaren asmoa zen natura maitatzea, zaintzea eta errespetatzea, sakontasunean baloratuta, eta artearen lengoaiak eskaintzen dituen aukeren bidez”, azaldu du Fernando Echarrik, Nafarroako Unibertsitatearen Museoko heziketa-arloaren arduradunak.

Ekimen honek, hain zuzen, 5 eta 11 urte arteko hogei bat gazteri artista horren figura hurbildu zien. Sakon begiratzea eta ingurumena osatzen duten zenbait elementu ezagutzea ekarri zien, hala nola ura, harriak, begetalak, naturaren aztarnak, denboraren joana… “Baina garrantzitsuena da inguruan egokitu zaien naturarekin bizitzen ikasi dutela, hura zaintzea baloratuz”, gehitu du Echarrik.

Mar García Mancoeducako koordinatzaileak haurrei “ingurune ezagunenak behatzeko” aukera eskaintzearen garrantzia nabarmendu du, “izan ere, baita ingurune ezagun horietan ere, gauza berriak aurki baitaitezke, beste begi batzuekin begiratzen badiegu. Eta hori lortu nahi dugu, parte hartzen duten neska-mutikoek ingurura begiratzea eta forma berriak aurkitzea, honetan dauden mundu berriak eta inguratzen gaituztenak. Gure etxeetatik gertu, ingurune zoragarriak daude, haiek ezagutu eta aurkitzeko gai bagara, eta Ibai Parkea haietako bat da”.

Atarrabiako San Andres Errota zaharra jarduera honetarako esparru moduan aukeratu izanaren zergatiaren gainean, bi erakundeek argi dute. “Palazuelo argiaz eta uraz baliatzen zen, beste elementu batzuen artean, bere lanak egiteko, eta Ibai Parkean ura, argia, koloreak eta kontrasteak ditugu. Haren lan abstraktuak bizi eta hurbileko bihurtzen dira, ikusten duzunean zuhaitzetako hostoak argiarekin jolasten direla antzeko modu batean”, azaldu du Marrek.

Argi dago ingurumen-heziketak sustatzen duen diziplinarteko ikuspegiak ahalbidetzen duela artea erabili ahal izatea ingurumen-helburuak lortzeko. Bi erakundeek jorratzen eta defendatzen duten premisa bat da hori. Izan ere, ez da baterako jarduera batean lankidetzan aritu diren lehen aldia (hemen irakurri) eta, ikusirik esperientzia bikaina izan dela, baliteke berriro aritzea.

“Arteak, naturak bezala, hunkitu egiten gaitu, eta mota honetako jarduerek ekartzen dute inguruan dugunaren jakitunago diren pertsona moduan heztea”, amaitu du Mar Garcíak, bazkideari laguntza eskainita beste okasio batzuetarako.